********************
شهرين كل سنة
بقضيهم بالهنا
وارجع للغربة تاني
للضيق والعكننة
أرجع عند الكفيل
لحزن وليل طويل
والغلب والضنا
شوارع مش عارفها
مساكن مش طايقها
وياما تهت أنا
عايشين في بلاد غريبة
عيشة مُرة وكئيبة
مصيبة تجيب مصيبة
والشوق هدِّنا
لغيرنا شغالين
صُناع وبنايين
عُمال وفلاحين
وفُتنا أرضنا
كلنا واحنا جايين
بنحلم بالملايين
نبني عمارة كبيرة
ونعمل فلوس كتيرة
ترم عضمنا
ياما عشناها هموم
اليوم ييجي الف يوم
ونقول على العموم
آخرتنا مش هنا
سنة بتجيب سنة
نضحك ونقول دي هانت
لمَّا شيبتنا بانت
والضهر أهو انحنى
أنا عايش وحيد
مش لاقي لإيدي إيد
والليل ماشي عنيد
وبسأل إيه ذنبنا
إيه فايدة دموعي
بعد ما دابت ضلوعي
وعايش على المنى
رجعنا بالهدايا
والبدلة والعبايا
ونسينا نفسنا
يللي بتبيع سعادة
أرجوك اعمل حسابي
دا لو هتشوف كتابي
مش هتلاقي هَنا
دياب محمود حسن
Aucun commentaire:
Enregistrer un commentaire