وليد ايوب // ما هم شو قالوا

ما همّ شو قالوا 

شعر: وليد أيّوب

 ما همّ شو قالوا

 يا شعرها

  ان تركتو جعدي ومطعّجة حبالو

 او فردتو 

 بيصير مثل خيطان الحرير 

بتلاعبو النسمات

  وبتفتلو عالصدر والاكتاف

  ويعود تيغطّي الظهر 

 وتترتّب خيوطو

   هيك لحالو

  ما همّ شو قالوا

  يا شفافها  الاشهى من جرار العسل 

 واحلى من الخرّوب

  لمّا يروب

  وبقول نيّالو اللي يبادلا كلمة وشوشة 

تتزغر الفسحة  بيناتهم لثنين

 ازغر من فتر

   ويحسّ انفاسا 

تلفح اكتافو

وتهزّ شعرات الصدر 

وتخربط احوالو

  ما همّ شو قالوا

 جهلان او طايش 

بعد الشفايف يذكرن لخدود

  السرقت حلاها ولونها لورود منهن 

كريمه على كعكة كرز

 بدوّخو يا ناس من غير كاس

  كنها خيوط الشمس 

 قبل ما يضب الرمس

تنعكس عنهن 

يطرى وهجها تصير

 مثل لمسات الحرير كرمالو

  ما هم شو قالوا

 يا قدها المثل الرمح 

ما في حدا قدّا 

الحور حدّا تبهت لوانن

  وتشحب الجنه

  قديش متهنّي

  ما في حدا فرحان مثلو

  لا المؤمن بربّو

 وموعود بالجنه

  وأنهار معسوله 

 وبأنبيا وصلّاح يسكنوا جنبو

 كنهن صحابو او كنهن جيالو

 ما هم شو قالوا

 ريت الحلم يصبح علم 

ويفيق قبل الريق ما ينشف 

يلقى حبيبة القلب بحضانو

  شفافا على ذانو

  بتوشوشو قدّام كل الناس 

وتهمس بكلمات الغزل وتقول 

مش معقول، ماني مصدّقه

  يا اهل الله حبّي على جنبي 

وصرت ست البيت

  مرتو وحلالو 

ويطقّوا عزّالو

بقلم الشاعر وليد ايوب